Home One Line P2 இந்திய தேசிய சினிமா விருதுகள் : கங்கனா ராவத் சிறந்த நடிகை

இந்திய தேசிய சினிமா விருதுகள் : கங்கனா ராவத் சிறந்த நடிகை

155
0
SHARE
Ad

புதுடில்லி : 2019-ஆம் ஆண்டுக்கான இந்திய சினிமாவுக்கான 67-வது தேசிய விருதுகள் நேற்று திங்கட்கிழமை (மார்ச் 22) அறிவிக்கப்பட்டன. அந்த விருதுகளின் பட்டியலில் இந்தி நடிகை கங்கனா ராவத்துக்கு சிறந்த நடிகை விருது வழங்கப்பட்டிருக்கிறது.

“மணிகர்னிகா”, “பங்கா” என்ற இருபடங்களில் சிறந்த நடிப்பை வழங்கியதற்காக கங்கனா ராவத் சிறந்த நடிகைக்கான விருதைப் பெறுகிறார்.

அண்மையக் காலமாக பாஜகவுக்கு ஆதரவாகவும் கங்கனா ராவத் செயல்பட்டு வருகிறார் என்பது குறிப்பிடத்தக்கது. எனினும், மேற்குறிப்பிட்ட இரண்டு படங்களிலும் அபாரமான நடிப்பை கங்கனா வெளிப்படுத்தியிருந்தார்.

#TamilSchoolmychoice

மேலும் அடுத்து அவர் நடிப்பில் தமிழிலும் இந்தியிலும் வெளிவரவிருக்கும் “தலைவி” என்ற படமும் பெரும் எதிர்பார்ப்பை ஏற்படுத்தியிருக்கிறது. ஜெயலலிதாவின் சினிமா, அரசியல் வாழ்க்கையை அடிப்படையாகக் கொண்ட இந்தப் படத்தில் ஜெயலலிதா கதாபாத்திரத்தில் கங்கனா நடித்திருக்கிறார்.

பார்த்திபனின் ‘ஒத்த செருப்பு’ படத்திற்கு 2 விருதுகள்

2019-ஆம் ஆண்டுக்கான இந்திய சினிமாவுக்கான 67-வது தேசிய விருதுகளின் பட்டியலில் நடிகரும் இயக்குநருமான பார்த்திபன் உருவாக்கிய “ஒத்த செருப்பு சைஸ் 7” திரைப்படம் இரண்டு விருதுகளைப் பெற்றிருக்கிறது.

ஒரே ஒரு கதாபாத்திரத்தை மட்டும் வைத்து உருவாக்கப்பட்டிருக்கும் இந்தப் படத்தின் முயற்சிக்கு சிறப்பு தேசிய விருது வழங்கப்பட்டிருக்கிறது. இந்தப் படத்தில் சிறந்த ஒலிப்பதிவை வழங்கிய ரசூல் பூக்குட்டிக்கு சிறந்த ஒலிப்பதிவுக்கான தேசிய விருது வழங்கப்பட்டிருக்கிறது.

ரசூல் பூக்குட்டி ஏற்கனவே ஒலிப்பதிவுக்காக ஆஸ்கார் விருது பெற்றவராவார்.

டி.இமானுக்கு சிறந்த பாடல்களுக்கான இசையமைப்பாளர் விருது

67-வது தேசிய சினிமா விருதுகளின் பட்டியலில் சிறந்த இசையமைப்பாளர் விருது, பாடல்களுக்காக டி.இமானுக்குக் கிடைத்திருக்கிறது.

அஜீத் குமார் நடித்து மாபெரும் வெற்றி பெற்ற “விஸ்வாசம்” படத்தில் சிறந்த பாடல்களுக்கான இசையமைப்பை வழங்கியதற்காக டி.இமானுக்கு இந்த விருது வழங்கப்பட்டிருக்கிறது.

குறிப்பாக அந்தப் படத்தில் இடம் பெற்ற “கண்ணான கண்ணே” என்ற பாடல் பட்டி தொட்டியெங்கும் ஒலித்து பிரபலமானது. ஒரு தந்தைக்கும் மகளுக்குமான உறவை தான் வடிவமைத்த அழகான வரிகளால், உருக்கமான பாடலாக உருவாக்கியிருந்தார் கவிஞர் தாமரை.

அந்தப் பாடலை சித் ஸ்ரீராம் தனது இனிய குரலால் சிறப்பாகவும், உருக்கமாகவும் பாடியிருந்தார். இந்த அம்சங்கள் அனைத்தையும் ஒருங்கிணைத்து அற்புதமான இசையமைப்பை வழங்கியிருந்தார் டி.இமான்.

இவர்கள் அத்தனை பேரின் கூட்டு முயற்சிக்கும் உழைப்புக்கும் தேசிய விருது என்ற மிகப் பெரிய அங்கீகாரம் கிடைத்திருக்கிறது.

விஜய் சேதுபதிக்கு சிறந்த துணை நடிகர் விருது

அந்த விருதுகளில் சூப்பர் டீலக்ஸ் தமிழ்ப் படத்தில் திருநங்கை கதாபாத்திரத்தில் நடித்து அசத்தியிருந்த விஜய் சேதுபதிக்கு சிறந்த துணை நடிகருக்கான விருது வழங்கப்பட்டிருக்கிறது.

பல படங்களில் கதாநாயகனாக நடித்திருந்தாலும், நடிப்பு ஒன்றுக்கு மட்டுமே முக்கியத்துவம் கொடுத்து சிறிய கதாபாத்திரங்களிலும், ஏன் வில்லன் கதாபாத்திரங்களிலும் நடித்து கலக்கி வருபவர் விஜய் சேதுபதி.

சூப்பர் டீலக்ஸ் பல சிறிய கதைகளை உள்ளடக்கியத் திரைப்படமாக வித்தியாசமான முறையில் உருவாக்கியிருந்தார் இயக்குநர் தியாகராஜன் குமாரராஜா. பரவலான வரவேற்பையும் விமர்சனங்களையும் இந்தத் திரைப்படம் பெற்றது.

அந்தப் படத்தில் ஒரு திருநங்கை கதாபாத்திரத்தில் துணிச்சலாக நடித்திருந்தார் விஜய் சேதுபதி. அவரின் வித்தியாசமான முயற்சிக்கும் உழைப்புக்கும் சிறந்த துணை நடிகர் விருது கிடைத்திருக்கிறது.

சிறந்த தமிழ்ப் படமாக “அசுரன்” தேர்வு

அதன்படி சிறந்த தமிழ்ப்படமாக “அசுரன்” தேர்ந்தெடுக்கப்பட்டிருக்கிறது.

பூமணி என்ற தமிழ் எழுத்தாளரின் “வெக்கை” என்ற நாவலை அற்புதமான திரைப்பட அனுபவமாக உருமாற்றியிருந்தார் வெற்றி மாறன். அவரின் உழைப்புக்கும், அதற்கேற்ப ஒத்துழைத்து தனது நடிப்பில் மெருகேற்றியிருந்த தனுஷின் பங்களிப்புக்கும் உரிய மரியாதைகள் இந்த விருதுகள் மூலம் கிடைத்திருக்கின்றன.

பொதுவாக தேசிய விருதுகளைப் பெறும் திரைப்படங்கள் வசூல் ரீதியாக வெற்றி பெறுவதில்லை என்ற சூழலும் எப்போதும் நிலவி வருகிறது. ஆனால் அசுரன் திரைப்படம் வசூல் ரீதியாகவும் மாபெரும் வெற்றி பெற்றது. 1000 மில்லியன் ரூபாய்க்கும் மேற்பட்ட வசூலை அசுரன் உலக அளவில் வசூலித்தது.

அசுரன் படத்திற்காக தனுஷூக்கு சிறந்த நடிகர் விருது

அசுரன் படத்தில் சிறப்பான நடிப்பை வழங்கிய தனுஷ் தேசிய அளவில் சிறந்த நடிகருக்கான விருதைப் பெற்றிருக்கிறார்.

தனுஷ் இரண்டாவது முறையாக சிறந்த நடிகருக்கான தேசிய விருதைப் பெறுகிறார். ஏற்கனவே, ஆடுகளம் படத்திற்காக தேசிய விருதைப் பெற்றவர் தனுஷ்.

ஆடுகளம், அசுரன் இரண்டு படங்களையும் இயக்குநர் வெற்றிமாறனே இயக்கியிருந்தார் என்பதும் குறிப்பிடத்தக்கது.

சிறந்த நடிகருக்கான விருது மனோஜ் பாஜ்பாயி என்ற இந்தி நடிகருக்கும் வழங்கப்படுகிறது. “போன்ஸ்லே” என்ற படத்தில் நடித்ததற்காக அவருக்கு சிறந்த நடிகருக்கான விருது வழங்கப்படுகிறது.

ஆக, 2019-ஆம் ஆண்டுக்கான சிறந்த நடிகருக்கான விருதுகள் இரண்டு நடிகர்களுக்கு இந்த முறை வழங்கப்படுகிறது.

Comments